主場夠惡唔赦強敵
意甲今晚有場前列大戰，維羅納主場迎戰意大利盃盟主拿玻里。新升班嘅維羅納無疑係今季神奇球隊，依家排第7只落後拿玻里1分，仲有機會爭奪來季歐洲賽資格，佢哋主場火力向來強勁，而且爭勝意欲極高，為3分必定照搶，捧中位數2.5球大盤有着數。

（Now 638、有線654、614台及myTV Super301周三凌晨1時30分直播）

維羅納上季靠升班附加賽先上到意甲，估唔到喺主帥祖歷執教下，今季有神奇演出，佢哋復賽首仗延續上半季良好表現，主場2比1殺退卡利亞里。雖然前鋒波連尼上場食紅牌要停賽，不過另一射手迪卡米尼連入兩粒，打破超過半年嘅入球荒，信心返晒嚟。

拿玻里前鋒高質
維羅納今季主場夠惡，近4場聯賽主場全勝，而且連續5場聯賽主場至少入2球，近6場聯賽主場總入球均達3球或以上，主攻踢法幫球隊搵到食，今場當然唔會輕易改變。

拿玻里早前勇奪意大利盃冠軍後，已經鎖定來季歐霸盃資格，但佢哋更想爭入前4踢歐聯，冇理由咁早放棄，何況球隊有梅頓斯、米利克同恩斯治尼等高質前鋒，近3場聯賽作客全勝，今場好大機會演入球大戰。