目前排英超第4位嘅車路士，聯賽重開後第1擊今晚作客阿士東維拉，「藍戰士」喺聯賽停擺前表現回勇，休戰期間更有猛將傷愈復出，為保歐聯參賽資格必定全力爭勝，車路士近期閉門熱身賽展現良好狀態，今戰兵疲嘅阿士東維拉值得睇好，客勝可期。（Now 621周日晚11時15分直播）

車路士今季用「青春班」效果理想，雖然季中一度演出下滑，不過停擺前3場聯賽2勝1和已有回勇之勢，中場小將基摩強勢上位，令球隊再添可用之兵。停擺期間，今季重傷未曾上陣嘅羅夫度斯卓克已康復，日前熱身賽7比1大勝昆士柏流浪一仗更有2個入球，基斯甸普列錫、赫臣奧杜爾等都傷愈，尋日42歲生日嘅領隊林柏特有更充足兵源可調動。

維拉周中激戰後未回氣
維拉依家深受降班威脅，自從主力前鋒韋斯利摩拉斯及首席門神湯希頓提早收咧後，球隊成績直線插水，呢兩位主將目前仍然無法候命，阿士東維拉周中同錫菲聯激戰，僥倖拎到1分，3日後再鬥車路士，體力難免輸蝕。車路士近5次聯賽對阿士東維拉均能取勝，今場不妨繼續追客勝。