隨住各大聯賽陸續重開，嚟緊又回復日日有波玩嘅日子，阿King今晚亦心水滿瀉，其中德乙獨腳戲，1哥比勒費爾德主場對特雷斯登值得留意。比勒急於封王兼鎖定「直升」資格，遇上包尾大幡嘅特雷斯登，誓要大勝吐烏氣，讓一球照捧上盤。（myTV SUPER周二凌晨2時30分直播）

查實比勒狀態麻麻，聯賽重開後5仗只得1勝4和，幸好升班勁敵漢堡同史特加唔爭氣，未計周日賽果，佢哋仍領先次席漢堡5分，如果今仗贏波，嚟緊周中再贏埋達斯泰特，就好大機會奪冠，並且取得直接升班資格，梗係唔會留手喇。另邊廂，特雷斯堡因有球員確診新冠肺炎，要延至上月尾先比賽，為追進度兩周內連踢5場，真係攰到爆，造訪矢志贏波嘅比勒，大敗唔奇。

瑞典超方面，希爾星堡主場對升班球隊華堡，希堡18歲中場新星基哥域極具潛力，有傳連阿仙奴及曼城都對佢有興趣，仲有曾喺英超搵食嘅馬田奧臣加盟，點秤都贏實力平平嘅華堡，主勝好路。（周二凌晨1時開賽、馬會網上文字直播）最後係西乙，特內里費主場對馬拉加，兩軍都攻力麻麻，近6次碰頭有5次開2球或以下，捧2.5球嘅細盤最穩陣。（周二凌晨3時30分開賽）