今晚德甲尾場上演矚目大戰，聯賽榜「2哥」多蒙特主場迎戰哈化柏林。多蒙特落後拜仁慕尼黑7分，爭標機會渺茫，而且今場續有多名主力因傷停缺陣，面對聯賽重開後4戰不敗、愈戰愈勇嘅哈化柏林冇必勝把握，多蒙特仲要讓到一球、球半咁多，波童捧下盤。

（Now 670、有線651及611台周日凌晨零時30分直播）

曉姆斯停賽缺陣
多蒙特自從於冠軍前哨戰輸畀拜仁0比1，已被後者拉開7分差距，聯賽剩餘5輪，想後上奪標機會已經十分渺茫，雖然佢哋上場作客柏達邦極速反彈，以6比1大炒對手，不過喺挪威中鋒艾寧夏蘭特因傷缺陣下，上半場表現乏善足陳，如非對手下半場連番犯錯同喺比賽末段體力下降，多蒙特未必能夠贏得咁輕鬆。

多蒙特現時只比排第5嘅利華古遜多4分，依然要搶分確保來屆歐聯參賽資格，不過中堅曉姆斯因累積黃牌夠數，今場要坐波監，對已有中路守將薩加度、尼高舒侯斯及防守中場達侯特倦勤嘅防線產生極大影響，前鋒艾寧夏蘭特復操但未必有十足狀態，殘陣出擊爭勝本錢大打折扣。

哈化停擺期間任命拉巴迪亞成新主帥，呢名擁有多年德甲執教經驗嘅教頭令球隊脫胎換骨，由停擺前6場聯賽1勝、變成重開後4戰不敗，除對聯賽榜「3哥」RB萊比錫打和2比2，其餘3戰全勝兼冇失波，聯賽榜已攀升至第9位，僅以4分落後第6位嘅禾夫斯堡。

睇埋往績，總計聯賽及盃賽，哈化近4次作客多蒙特法定時間之內只輸過1次，今場多蒙特讓唔起一球、球半，下盤捧得過。