遇強死守耍家
今晚德盃爆發4強戰，沙貝魯根主場越級挑戰德甲「5哥」利華古遜。沙貝魯根喺今屆德盃屢創奇迹，遇強有晒死守準備，利華啱啱喺聯賽激戰輸畀拜仁未回氣，超新星夏維斯又有傷上陣成疑，加上近屆喺德盃對非德甲球隊多數少交收，中位數3.5球嘅入球細值捧。（香港開電視77台、有線661及601台周三凌晨2時45分直播）

沙貝魯根只係德國南部聯賽球隊，級別上仲低過德丙，不過佢哋喺今屆德盃展開神奇之旅，法定時間4戰取得2勝2和，曾淘汰兩支德甲球隊科隆同杜塞爾多夫，認真唔講得笑。其中近兩圈對住卡爾斯魯厄及杜塞爾多夫，法定時間打和0比0及1比1，最終捱到互射12碼踢對手出局，睇得出呢支弱旅幾有自知之明，遇強必定採取守字訣，今仗一定再嚟呢招。

利華質素梗係高好多，難得今圈遇弱，絕對係殺入決賽嘅大好良機。不過利華史上只曾3次進身德盃決賽，仲僅得1993年封王，踢盃賽唔算相當耍家，今仗就算遇弱亦會小心為上。

夏維斯有傷未必踢
今季最大目標係下屆歐聯入場券嘅利華，日前喺聯賽關鍵戰先同拜仁激鬥，仲倒輸2比4，眾將都搏得好盡，匆匆再戰體力未回復，最弊係超新星夏維斯上仗已經因傷倦勤，今仗未知能否趕及披甲，冇咗呢位士哥頻頻嘅射手，攻力必定受削。

翻查紀錄，利華近8次喺德盃對住非德甲球隊，法定時間有6次開3球或以下，今仗戰情隨時陷入膠着狀態，預計利華頂多小勝，客W冇肉食，轉捧中位數3.5球嘅入球細好過。