韓職周六壓軸戲，有升班球隊釜山偶像主場迎戰衞冕嘅全北汽車。全北喺揭幕戰憑李東國一箭定江山，主場險勝水原藍翼，表現雖未見冠軍霸氣，不過整體質素仍屬高班，造訪經驗不足嘅釜山，可望以質取勝，客勝值博。

（myTV SUPER周六晚6時直播）

釜山播球迷叫聲嚇全北
釜山以傳控踢法為主，上場迎戰浦項制鐵空有控球，最後卻慘吞兩蛋，交出沉重「學費」。睇番佢哋上場派出5個新兵做正選，默契唔夠，新兵之一嘅烏茲別克守將杜蘇洛夫更兩次犯錯導致失波，巴西前鋒雲迪仙高首演亦明顯未適應新環境，令表現活躍嘅李東俊經常陷入孤立。釜山攻守皆有問題，踢法上亦需調整跟上韓職節奏，季初表現難寄厚望。

由於閉門作賽，可能釜山自知唔夠全北鍊，為咗加強主場氣勢，將喺今日透過LED公告板，發送官方SNS收到嘅球迷打氣短訊，仲會通過喺球場播放虛擬歡呼聲，以至球迷吶喊聲，希望谷起士氣兼嚇窒對手。

不過全北作客一啲都唔弱，佢哋上季18場聯賽作客僅1敗，並且取得10勝7和絕佳成績。教練莫理斯踢法着重控球及組織，同釜山風格相近，「貨比貨」下，全北球員經驗同質素明顯較高，即使作客仍值得睇好。