今晚俄超獨腳戲上演護級大戰，FC坦波夫於中立場硬撼森馬拉。FC坦波夫攻力疲弱，仲冇埋地利唔敢亂嚟，森馬拉新兵太多磨合需時，仲有中場悍將安頓辛高夫斯基坐波監，必先做好防守，為免喺呢場「護級6分波」有閃失，一定穩打穩紮，寧捧2.5球嘅入球細。（周二凌晨零時30分開賽）

森馬拉新兵多磨合需時
在新冠肺炎陰霾下，俄超係依家歐洲少有地仍繼續開打嘅聯賽之一。FC坦波夫因為本身嘅主場唔符合聯賽要求，今仗要改喺500公里外嘅中立場下諾夫哥羅德球場舉行，頓失地利，呢班波今季21場聯賽只入23球，單計近4仗聯賽，就有3仗食白果，攻力之弱有辦你睇，因此更加重視防守，經常使用5人防線，以穩守突擊博偷雞。

另一邊廂，森馬拉前鋒簡奴尼哥夫仍要養傷，蘇保利夫亦喺冬季轉會窗改投莫斯科斯巴達，兩人正正係首循環輕取FC坦波夫2比0嘅入波功臣。雖然佢哋亦增添6名新兵，包括借得莫斯科斯巴達中場古辛高夫，但人多手腳亂，班新兵明顯未適應，而且中場悍將安頓辛高夫斯基上仗領紅牌被逐，今仗需要停賽，冇咗佢坐鎮中場做掃蕩，勢必要喺防守多下工夫，查實佢哋攻力仲差過FC坦波夫，今季聯賽入得22粒咁大把，單計近12場聯賽，就有11場開2球或以下。翻查紀錄，兩軍近4次正面交鋒，全開2球或以下，由於大家同於下游掙扎，喺呢場「護級6分波」唔敢輕舉妄動，海軍鬥水兵格局入波唔慌多，2.5球嘅細盤穩開。