经过两日欧联激战后，今晚轮到欧霸32强次回合上演，其中阿仙奴返主场再斗奥林比亚高斯。首回合阿仙奴先赢1粒，近期沦为后备嘅拿卡锡迪，难得担正必搏尽争士哥；奥林比亚高斯为收复失地冇得死守，可望合演入球骚。
（Now 644、有线661及601台周五凌晨4时直播）
正所谓踢而优则教，尤其係中场球员执起教鞭，大部分都比后衞及前锋任教成功，因为佢哋需要良好嘅视野，先可以贯彻执行战术，例如几时补位助守、如何转守为攻，呢啲经验对日后执教时，分析场上形势从而作出调动，帮助甚大，哥迪奥拿正係表表者。而师承哥帅嘅阿迪达，接手阿仙奴后着力改善中后场组织力，只要能掌控大局，唔愁冇波入，喺佢调教下众将明显有进步，例如不擅防守嘅奥斯尔落力做逼抢，惯性自己「死去」嘅尼高拉斯比比亦开始同队友配合。
奥林比亚高斯焗攻冇得留
阿迪达以态取人，近期联赛起用小将尼基迪亚担正打中锋，主因係拿卡锡迪冇态，愈唔入波就愈急躁。阿帅观人于微，宁愿放佢喺后备席冷静一下，果然收效，拿卡锡迪先喺联赛对纽卡素打破入球荒，上周欧霸首回合作客奥林比亚高斯重任正选，末段帮球队一箭定江山，预计今仗佢会再获上阵机会，定必全力争取表现。
作客嘅奥林比亚高斯落后1球，为晋级冇得坐以待毙，造访酋长球场照样抢攻，何况阿仙奴于近7场欧霸主场6次开3球或以上，预计今仗实多波入。
