欧联16强首回合好戏连场，今晚焦点当然係皇马主场对曼城，不过我对同时间开波嘅里昂主场对祖云达斯更感兴趣，始终与「皇曼战」相比，呢场两军实力有明显分野，相信祖记可恃质先拔头筹。

祖记绰号係「老妇人」，其成熟稳重嘅风格，从佢于意甲8连霸嘅战绩，可知一二。与昔日AC米兰注重欧联、祖记着重联赛不同，随着前者近季不断沉沦，祖记已成为意甲球队于欧洲赛争取佳绩嘅一面旗帜，近几届都顺利进身淘汰赛，不过佢哋未能摆脱二奶命，自从1996年封王后，过去24年曾5度杀入决赛，可惜全部饮恨而回，包括2015及2017年先后输畀巴塞同皇马，令功勋满身嘅老门神保方，始终与欧联冠军擦身而过。虽然欠运，但不能否认，祖记係近年于欧联战绩最稳定嘅意甲球队，实力上毋须怀疑。

里昂今非昔比
里昂早已告别2001至2008年联赛7连霸嘅光辉岁月，喺巴黎圣日耳门强势垄断下，呢支褪色班霸于国内联赛，甚至要为争一张欧联入场券而搏足全季，今季于法甲更只排中游，好难与实力、雄心兼备嘅祖记相提并论，就算有地利之助，亦难被睇好。