喺泰国举行嘅U23亚洲盃，今晚有B组及C组分组赛开打，其中B组尾场日本U23硬撼沙特阿拉伯U23。日本主帅森保一为洗脱「二奶教头」污名，今届剑指冠军，而且「蓝武士」于近届分组赛例必先发制人，半场主胜有计。（Now 672、有线653及613台周四晚9时15分直播）

由于日本係今年东京奥运东道主，毋须喺U23亚洲盃争入三甲以获取奥运入场券，但主帅森保一过去两年，先后带队出战亚运、亚洲盃同东亚盃，竟然全部只得亚军，为摆脱「二奶教头」恶名，梗係想捧走U23亚洲盃，顺便为今夏奥运造势。其麾下嘅远藤溪太、小川航基、相马勇纪及田中碧等，都係早已部署好出战奥运嘅班底，今次更加入赫斯前锋、有「浪速美斯」之称嘅食野亮太郎，对冠军可谓志在必得。

相反，沙特阿拉伯U23连续2届喺分组赛出局，而且大部分球员都喺国内搵食，其水準比唔上日职、韩职等联赛，实力难以提升，令佢哋与「东亚双雄」日本及南韩嘅实力愈拉愈远。加上日本最擅抢开局，近2届合共6场分组赛唔单止赢晒，其中5场均在上半场已取得领先优势，踢法咁抢缰，半场主胜乃不二之选。

中韩对战撑小太极虎
同时间亦有C组大战，南韩U23火併中国U23。南韩U23虽未有召入两大中场李康仁及白昇浩，但仍有郑优营、严原上、金大元及郑承原压阵，近两届共6场分组赛取得4胜2和之余，最终都杀入4强。中国亦有张玉宁、杨立瑜等担大旗，但实力唔及「小太极虎」，加上近2届分组赛仅得1胜，宁捧让球主胜。（Now 670、有线651及611台周四晚9时15分直播）