上場作客被狼隊逼和嘅曼聯，重返奧脫福主場鬥「私房菜」水晶宮。水晶宮開季兩戰不勝兼無入波，加上近12次聯賽鬥曼聯只得2和10負，往績衰到爆，單計近6次作客奧脫福1粒都未入過，「紅魔」絕對可大勝一場，一抹上場普巴射失12碼痛失2分嘅陰霾，曼聯讓一球／球半，必捧上盤。
（Now 621周六晚10時直播）
「普巴風波」令紅魔更團結
曼聯銳意革新，開鑼戰大炒車路士後，球員信心飆升，上場對狼隊雖然先勝後和，並有中場保羅普巴疑似同拉舒福特爭射12碼備受抨擊，難得球員及官方嚟一次終極大團結力撐普巴，射失12碼事件反令士氣增強。不過上仗正選上陣嘅丹尼爾占士及連格表現麻麻，估計領隊蘇斯克查會改用桑馬達及安達斯彭利拿代替，活力可能稍遜，但係穩定性就有增無減，拉舒福特同安東尼馬迪爾腳風咁順，可望輕易打開紀錄，只要踢出首戰水準，重響勝鼓唔成問題。
水晶宮頭兩場聯賽先以0比0和愛華頓，上場作客升班嘅錫菲聯以1球落敗，令人失望。王牌韋費特沙夏暑期被轉會轉聞困擾，狀態未足，鋒力大受影響，由車路士加盟嘅中堅加利卡希爾亦連續2場做後備，能否加強水晶宮防守有待證明。水晶宮近12次聯賽鬥曼聯只得2和10負，仲要近6次作客奧脫福都未能攻陷紅魔大門，曼聯要贏兩粒以上簡直易如反掌。
