今晚上演最後2仗非國盃16強賽事，其中尾場有「黑星」加納硬撼突尼西亞。突尼西亞今屆仍未開齋表現令人失望，最大問題係攻力疲弱，加納前線靠阿休兄弟亦見吃力，因此近期興玩拉布，半場和值得再追。

（myTV Gold 302、now 639、有線655及615台周二凌晨3時直播）

突尼西亞一向攻力麻麻，今屆非國盃將進攻中場卡斯里推前一格，但呢位喺聖伊天同樣「裝假9」表現突出嘅王牌，返到國家隊因缺乏供應，變得孤掌難鳴，喺E組分組賽次輪對馬里嘅入波，只係射罰球省中人牆改變方向破網，難怪今屆成隊波入得兩粒咁大把，仲要3場分組賽全部打和未贏過，咁樣都攞到次名出線，真係大話夾好彩。

冷敲馬里「第一隊入球」
另一邊廂，加納雖然喺F組以首名出線，但3仗只得1勝2和，表現唔算出色，尤其係老將基恩嚴重跌Watt，今屆只曾兩次後備入替兼食白果，前線惟有倚重阿休同佐敦阿休擔大旗，2人合共入3粒，不過單靠佢哋兩兄弟孭飛，其他隊友行行企企，咁樣蛇都死喇。而且「黑星」最鍾意玩拉布，連同熱身賽在內，近5仗有4次開半場和，今仗仲要係淘汰賽，相信於初段會更加保守，半場和不妨追多鋪。

至於頭場馬里對科特迪瓦，講牌面梗係「大象兵團」更勝一籌，喺D組分組賽取得2勝1負，但佢哋前線過於倚賴水晶宮翼鋒韋費特沙夏，容易畀人凍結。

相反，冇球星嘅馬里擅打整體戰，喺E組分組賽以2勝1和首名晉級，而且3場均先入波，證明擅長先發制人，加上近4次交手，亦有3次先開紀錄，既然咁搶韁，冷敲馬里「第一隊入球」更上算。

（myTV Gold 301、now 638、有線654及614台周二凌晨零時直播）