廠仔搶韁不畏虎
聽朝國冠盃北美站爆發重頭戲，皇家馬德里硬撼阿仙奴。「銀河艦隊」日前輸畀拜仁演出走樣，正選上陣嘅夏薩特冇料到，今仗夥拍雲尼斯奧斯祖利亞同賓施馬組成「VBH」新鋒線，決心省靚招牌；阿仙奴一眾生牯仔尼基迪亞、韋洛克及羅比般頓近幾場熱身賽表現可人，為博上位必定搶韁，初生之犢不畏虎，擺明鬥攻格局，中位數3.5球大盤值得支持。

（myTV Gold周三早上7時直播）

皇馬今夏大換血，羅致夏薩特、盧卡祖域及洛迪高高斯等新兵，連同原有嘅賓施馬、馬高阿辛斯奧及雲尼斯奧斯祖利亞，可謂人才鼎盛。

有指主帥施丹希望以雲尼斯奧斯祖利亞、賓施馬、夏薩特為「新3叉戟」首選。呢個「VBH」鋒線，有上季入球與助攻達「雙雙」嘅夏薩特，雲尼斯奧斯祖利亞喺邊路突破力亦相當強，中鋒賓施馬擅於鋪橋搭路，只要3人夾出默契，威力唔差得過全盛期嘅「BBC」鋒線。再者皇馬首場國冠盃對拜仁輸1比3咁失威，今仗唔會再hea踢，最基本要爭取入波，證明球隊火力。

兵工廠試新人效果佳
阿仙奴因轉會資金有限，至今仍未有強援加盟，主帥艾美利喺近幾場熱身賽起用大量生牯仔，效果出乎意料咁好，先係豪贈科羅拉多急流3蛋，之後喺國冠盃連挫拜仁同費倫天拿，尼基迪亞近兩仗入3粒弗到震，馬天尼利、巴卡約沙加、韋洛克等亦有士哥，比奧斯爾及奧巴美揚等主力更Sharp醒，呢班新丁難得有上位機會，定必拚盡希望新季能佔一席位。睇番往績皇馬近7次國冠盃對住英超球隊，有5次開4球或以上，鬥攻格局捧大盤更好路。