随住今晚热刺对利物浦喺马德里争逐欧联冠军后，代表今季欧洲各大主流联赛正式落幕。同为「英超内讧」，但Peter深信今晚会同日前欧霸决赛车路士对阿仙奴嘅战况，截然不同。
卡尼伤愈反令普帅烦恼
车仔对阿仙奴均属今季失意球队，好在车仔总算踢番场争气波，成功捧盃而回，亦令阿仙奴再次暴露缺点及斗心不足问题。相反热刺同利物浦经过重重考验，死里逃生跻身决赛，可谓势均力敌，好难会出现阿仙奴忽然崩溃嘅情况。
热刺喺有限资源下创造佳绩，主帅普捷天奴当然抵讚。不过佢哋始终係决赛「新丁」，经验唔够难免要交学费。射手哈利卡尼虽伤愈赶及复出，但久疏战阵未必够弗，强行派佢上阵反令弗爆嘅卢卡斯莫拉坐冷板，普帅点拣都係烦恼。以波论波，夫添出击嘅利物浦略胜一筹，除「埃及文明」外，不妨留意右闸阿历山大阿诺特，呢位20岁嘅小将，6岁已加入红军青训学院，佢能攻擅守，成长速度飞快，上年接连参加欧联决赛同世盃，绝对係年轻球员学习榜样。无论今仗「英超内讧」边队赢，相信会成为欧联其中一场经典。