日職周日「獨腳戲」上演下游之戰，由大阪飛腳（圖）迎戰鳥棲砂岩。雖然兩隊今季表現同樣令人失望，但飛腳始終人腳稍勝，而且砂岩又作客特差，「讓球」開平手盤信飛腳。

 
前日職盟主大阪飛腳繼上季表現令人失望，以第10名過終點後，今季縱使換上巴西教頭古比掌舵，可惜表現更加低處未算低，未計今輪聯賽，以10戰得七分排尾二，但其實與包尾的名古屋鯨魚同分。

雖然古比在執教大阪櫻花時獲得好成績而在日本足球壇有頗高江湖地位，但若飛腳持續不振，他亦會備受壓力，因此，今役面對弱旅砂岩，一定會扭盡六壬，以令球隊勝出。人腳方面，飛腳今役雖然續缺門將東口順昭、前鋒長澤駿及艾迪美臣巴拉加，但有後衞法賓奴復出，而且主力如射手黃義助及老將遠藤保仁等都可以候命，實力仍然不俗，有力射破砂岩大門。

未計今輪聯賽，鳥棲砂岩以10戰得八分排尾三，砂岩今季最大的問題是作客失分多，近六場作客比賽只得一勝五負，而且今季作客場場失波。今訪飛腳時，砂岩亦未能「夫添」，雖然有後衞鄭昇炫復出，但門將赤石拓、中場谷口博之及前鋒池田圭均不能候命，加上球隊近五次造訪飛腳又只得一和四負，今役平手盤低水，實在博唔過，寧要主隊飛腳。

文：吾中