孙兴民伤埋照抢头啖汤
今晚续演两场欧联16强首回合赛事，重头戏係英德对决，热刺主场迎战RB莱比锡。自「寸王」摩连奴接掌后，热刺踢法攻强守弱，虽则哈利卡尼续养伤，刚刚更有孙兴民因骨折要长抖，不过主场迎战防线残晒嘅莱比锡必以攻代守，黑柴推介中位数2.5/3球大盘。

（myTV Gold 303、Now 643、有线656及616台周四凌晨4时直播）

热刺近期喺英超3连胜，期间足总盃踢足两回合扫走修咸顿，南韩「亚洲之王」孙兴民喺呢5场比赛场场有士哥，上轮联赛作客阿士东维拉就梅开二度，可惜佢喺该仗后证实右臂骨折，预计要抖数周，今晚唔会出场，不过基于防线甩漏实在太多，相信热刺喺主场出击下，都会以攻代守，希望抢佔先机。

领队摩连奴上任后热刺成绩只算合格，难得欧联抽到好籤，今晚主场必然搏埋佢，况且「寸王」历来领军喺欧洲赛对德甲球队都係主强客弱，佢带队喺欧战主场对德甲球队成绩係8战5胜3和保持不败，但作客9仗就输咗7场，无论带领车路士、国米、皇马定热刺，摩连奴领军访德只係赢过史浩克，其馀对拜仁、多蒙特同不来梅全部输波。为晋级打好基础，热刺今晚必定丧抢，务求取得优势。

莱比锡欧联作客多波入
德甲「2哥」莱比锡经历咗一段唔短嘅低潮，近期作客赛和拜仁同主场轻取不来梅重拾状态，只可惜防线阵容严重不整，队长韦利柯宾、主力中坚伊巴希马干拿迪都因伤长抖，近两仗喺防线一夫当关嘅乌柏美卡奴又不幸累积3张黄牌要停赛，今晚焗住倚重19岁威尔斯守将艾芬安柏度，可惜佢欧联两度后备入替都曾犯错，表现未能予人信心，好在王牌前锋迪姆华拿继续着火，今季3线作战合轰25球，配合近期进步神速嘅攻击手柏德列舒希克同尼干古，面对热刺不稳防线绝对搵到食。莱比锡今届3场欧联作客每仗都入到两球，到访伦敦唔怕驳火。