今晚法足盃8强战，圣伊天于中立场出战非联赛球队埃皮纳勒。圣伊天状态低迷，防守甩辘频频失波係关键，埃皮纳勒上圈爆冷淘汰法甲「4哥」里尔唔讲得笑，冇心理包袱下必定抢攻，入球大更可取。（myTV Gold 302、now 639、有线655及615台周五凌晨4时直播）

圣伊天去年10月易帅，搵嚟前李斯特城教头佩尔接手，一度有起色，不过去到去年年尾又跌Watt，联赛连盃赛在内，近14仗竟然输咗9场，当中只有2场保持清白之身，共失28粒，防守错漏百出，亦同主力守将威廉沙列巴不时受伤有关，依家喺联赛徘徊下游，护级大过天，今仗有冇心去搏都成问题，防线随时继续中门大开。

埃皮纳勒表现吓你一惊
埃皮纳勒是今届法足盃神奇球队之一，头5圈在法定时间取得4胜1和，包括上圈凭科特迪瓦前锋卡拉素梅开二度，爆大冷以2比1击败上季法甲亚军里尔，令人喜出望外。讲开卡拉素，虽然佢今季入波唔算多，但每逢打法足盃特别醒神，近4圈入4粒弗到震，绝对係盃赛杀手，必定趁喺呢类大舞台入多几粒响朵。而且对埃皮纳勒嚟讲，其实已超额完成，冇乜嘢好输之下今仗更抢缰，撞正圣伊天嘅豆腐渣防线，捧入球大最上算。