近年世界盃，又或者說體壇，掀起了一股妖邪歪風，白頭沈實在不吐不快。

　　球迷都記得那隻於2010年決賽周估波百發百中的德國八爪魚保羅吧！自此之後，每逢世盃、歐國盃等，各地傳媒或搏出位的單位，事無大小自創估波神獸。非洲有人搵大蟒蛇估NBA總決賽、南美則有號稱專貼冷門的蜘蛛王、內地甚至搵狒狒預測美國大選……，類似例子不一而足，令人眼冤。

　　今屆世界盃，輪到鸚鵡受罪。據白頭沈的傳媒朋友透露，製作鸚鵡畀貼士的過程是不堪入耳，因為牠們在不甘受人播弄下，往往發出淒厲的叫聲作出無奈的控訴，聲音之大，據講是全報館皆可聞。

　　這種行為，是虐畜無異，同內地狗肉節有乜分別？為了這種低級趣味而難為動物，何苦呢？如果賭波賭到咁冇信心，要靠神獸過料，倒不如索性訴諸於怪力亂神啦，唔係更有把握咩？

　　白頭沈在此大膽建議，諗出諸如「雀神啄波」、「烏龜抽射」這些屎橋的賤人，下屆世界盃索性全球首創問米攞料，搵令壽堂分析吓聽晚場波有乜蠱惑，一定更加吸引兼有話題，淨係條題「搵死鬼老母估波」都夠晒爆啦吓嘩！橫掂你哋為咗出位，都唔知阿媽姓乜架啦！

　　在這些垃圾資訊趕客下，吸引力早已今不如昔的世界盃，真係多得你班食塞米唔少！