笔者现时身处英伦，梗係周围睇波及考察当今最富有、最受欢迎嘅英超联赛，快将踏入2017年，藉此机会谈谈2016年世界顶级足球带给球迷有何启示。
2016年绝对係C朗丰收嘅1年，单计个人荣誉已擸咗10个，包括《法国足球》杂誌颁发嘅金球奖；团队方面，C朗协助皇马称霸欧联、欧超杯及世冠杯外，更率领葡萄牙勇夺该国史上首个大赛锦标──欧国杯，死敌美斯亦相形见绌，最佳球员C朗当之无愧。至于老帅云尼亚里以蔗渣价钱，带领李斯特城神奇地于英超封王，今夏放走功臣尼高路简迪，虽然联赛战绩不如前，但「狐狸」首度征战欧联，即于分组赛首名出线16强，云帅绝对係最佳领队。
笔者今次造访英国多个城市，睇咗多场顶级英超赛事收穫甚丰，获得唔少启示，由于篇幅有限，今期先同读者倾倾车路士。车仔上仗联赛主场对般尼茅夫，主帅干地排出嘅「343」阵式非常机动，防守时会回收为「541」，就算有尼高路简迪及迪亚高哥斯达停赛，完全冇任何影响，轻轻鬆鬆赢3粒。众所周知，3人防线较难驾驭，干地却点石成金，季初错漏百出嘅大衞雷斯、艾斯派古达及加利卡希尔，在新阵式下互补不足，当艾斯派古达于右路助攻时，尼曼查马迪自动移后一格保护防线。近年沦为人球嘅域陀摩西斯，在新位置右翼衞尽显极佳效率，攻守兼备，乃「343」阵式发挥奇佳嘅一大关键。
当然不得不提核心夏萨特，佢具备仅次于C朗同美斯嘅世界第3质素，在新战术中释放出更强进攻威力，无论伙拍韦利安、柏度洛迪古斯或弗爆嘅「迪哥」，都能产生化学作用。干地变阵后激活众将潜力，联赛12连胜领放榜首，就算边个主力受伤或停赛都冇有怕，今晚主场对史笃城实食冇黐牙。至于笔者今次英伦之行亦会「朝圣」，与着名评述员马田泰莱倾波经，读者记紧留意未来几期呢个专栏。今次学法之旅，除咗补充笔者嘅足球思维外，亦为3月尾带队嘅睇波团做好准备。
