当呢个专栏出街嘅时侯，笔者已经身在英国伦敦，虽然如此，但仍会赶去晏菲路球场，睇今晚英超独脚戏利物浦主场对史笃城，并且带埋收音机，听师傅马田泰莱嘅英文评述，有亲切感之余亦可从中偷师。正所谓活到老、学到老，作为一名专业评述员，要时刻记住准备不足就等于准备失败。
讲番呢场利物浦对史笃城，儘管红军早前稍稍下滑，但今季亦冇欧洲赛包袱，可集中火力于国内赛事，好多时候只是一周一赛，比起阿仙奴及曼联双雄更有着数，所以喺未踢今轮之前仍位居「2哥」。早前笔者同马田泰莱倾波经，大家都认为车路士係一枝独秀（未计昨晚赛果），但其最大嘅争标劲敌，就係利物浦，倘若车仔忽然甩辘或窒步，红军便有机会从后赶上。
可惜，红军早前略为跌Watt，除主力菲腊比古天奴受伤缺阵外，主帅高普採用嘅高强度压迫战术，极度消耗体力，要长时间延续呢种打法，并非每名球员能适应到，亦成为佢哋争标隐忧，又睇吓对住史笃城兼非常频密嘅快车赛程，高普点样作出应对喇。
话说回头，点解圣诞流流笔者会远赴英伦呢？因为将于下年3月尾至4月头，笔者与旅行社合作搞睇波团，同一些资深评述员及电视艺员，带队去3大城市伦敦、曼彻斯特及利物浦，睇波同旅游之余，还会带团友与当地伦敦华人足球协会队踢波切磋。为做好呢个Job，笔者今次做先头部队，处理饮食、场地安排及联络当地嘅伦敦华人足球协会队，希望做足准备工夫，让团友有个愉快嘅睇波旅程。
金句：拆礼物日后的金句，准备不足等于准备失败。
