虽然今晚「拆礼物日」英伦赛事狂开快车，可惜英超戏码麻麻，其他好似英冠、英甲及英乙嘅赛事，好多都「佢识你、你唔识佢」，无谓乱嘥弹药于博彩上，今日不如趁机为香港足球嚟个回顾与前瞻。
讲到今年本港球坛嘅大事，不得不提係笔者嘅母会东方龙狮，于上年呢个时间，大胆扶正女教练「牛丸」陈婉婷为正印主帅，开创香港足坛先河，真的很佩服总监兼球坛巨人梁守志眼光独到，「牛丸」亦不负球队及其恩师郭家明所託，接手后带领球队勇夺港超联及银牌嘅双料冠军，自己亦打入健力士世界纪录大全、获颁铜紫荆星章、成为BBC年度百大女性及亚洲足协年度最佳女教练等殊荣，每次见到爱徒得奖，「郭指导」皆流露出满怀安慰嘅笑容，佢更向笔者细数爱徒由教练E牌考到A牌嘅过程。
面对同行获得如此成就，笔者于世界球坛高人中，学懂了解、欣赏、讚美係美德，在鸡蛋裏挑骨头嘅酸葡萄，只懂批评某些机构或高层，而欠缺具建设性嘅建议係冇用。其中今季开季前，港超联一度因赞助商问题而剩番7队，幸好透过足总主席梁孔德及董事会嘅努力，变番现时嘅11队，梁主席应记一功，佢为香港足球竭尽所能出钱出力，笔者为佢屡受抨击而感到不值。
闻说明年夏天香港会再次获得英超垂青，将第4度举办英超亚洲挑战杯，这次更会同中国合办，就算新加坡有个包埋冷气嘅全新球场都唔够香港挥，绝对值得骄傲。而笔者嘅恩师兼老友、71岁着名评述员马田泰莱，亦可能自2003年起，第8次亲赴亚洲为呢项英超季前重要杯赛讲波，到时必定同佢寒暄一番，顺便打番场「桂神老友友谊赛」。
近10年来，香港嘅青年足运已发展得具规模及专业化，希望2017年能製造更多未来新彗星，造福本地足球喇。笔者喺度祝各位读者「拆礼物日」快乐，身体健康。
金句：圣诞礼物轻情重，今晚唔赌为上着。
