挟近10仗9胜1和未输过之气势，弗到漏油嘅「一哥」利物浦，今晚英超作客「圣人」修咸顿。经过上季嘅整顿后，红军众将已经逐渐融入主帅高普嘅高强度压迫打法，尤其係季前训练不惜狂操体能，现时受益不浅，球员每仗跑动範围非常惊人，不断施压下总能令对手犯错而获得致胜机会。况且利物浦今季冇欧洲赛后顾，可集中火力打好联赛，头11仗联赛轰入30球，火力之强非「圣人」所能抵挡，呢个客Ｗ有买趁早。
至于「3哥」曼城则作客水晶宫，虽然「蓝月亮」于国际赛前嘅联赛，爆冷畀米杜士堡逼和1比1，但笔者认为只係小小嘅窒步，从之前欧联反胜巴塞3比1，「蓝月亮」明显处于复甦势头，查实佢哋只係落后榜首利物浦2分，为赶过对手必定搏尽争胜，面对近4仗联赛输晒沉到爆嘅水晶宫，客Ｗ可见手到拿来。
讲到今晚英超重头戏，当然係头场曼联主场对阿仙奴。红魔坐镇自己地头唔衰得，而阿仙奴近期走势亦唔错，又未到佢哋例必甩辘嘅「黑色2月」，呢场「魔仙大战」必有恶斗，从观赏角度係不容错过，但两军势均力敌，唔太有投注价值，想参与嘅可小注和波，论值博率就不及上面嗰两场嘞。
