英超上周完成咗第11轮赛事之后，联赛榜位置都已经有唔少嘅变动，利物浦暂时以26分高踞榜首，车路士大胜爱华顿5比0之后，亦升上联赛榜第2位，一直排喺头位嘅曼城，连同上场主场畀米杜士堡逼和在内，近5场联赛合共失咗9分，开季累积落嚟嘅优势一下子冇晒，依家要跌落联赛第3位。

曼联上场作客对史云斯全取3分之后，亦都升上联赛第6位，但仍然落后榜首嘅利物浦8分之多，如果仲想保持争标希望的话，下场主场对阿仙奴就一分都不能失。

睇番曼联对史云斯一战，受球队伤兵困扰，所以主帅莫连奴就将条防线嚟个大执位，中坚方面由马高斯卢祖搭住菲尔锺斯，达美安同艾舒利杨格就负责两边边路防守工作。呢个新配搭防线论合作性就一般，但球员个人能人比对手强，加埋有表现出色嘅卡域克代替安达靴里拉去做中场防守，所以对住中下游球队，未见有咩大问题，不过如果对住阿仙奴呢类攻击力强劲嘅球队，相信未必应付得到，后防不稳再加上射手伊巴谦莫域停赛，睇怕下周对阿仙奴，真係要靠朗尼、卡域克、菲尔锺斯呢几位费Sir留落嚟嘅「遗产」帮帮手至得喇。