虽然澳洲国家队忙住踢世界杯亚洲区外围赛，不过澳职冇让路，继续波照踢不特止，仲提早今日上演墨尔本城对纽卡素喷射机作为呢Round嘅头阵。主队墨尔本城今季被一致睇好，但上星期输畀布里斯班狮吼，係今季第二场败仗喇。虽然係咁，似乎信心无被动摇，呢场仲排出最强火力，由卡希尔领军嘅锋线肯定会大开杀戒，实行挥低实力低几班嘅纽卡素喷射机，主胜必捧。

（有线64及203台周四下午4时50分直播）

澳洲国家队下星期会喺世杯外围赛对泰国，墨尔本城中场鲁克巴坦成功入选，今日将会缺席。但係，国家队无搵国宝卡希尔喎，塬意係等呢位老将唞唞，但係班主就继续派佢上阵，保持球队火力。事实上，墨城喺主场攻力十足，对上15场主场比赛，只係得1场入少过两球，所以，大家明啦，今场又主场出击，绝对係入波保证。

墨尔本城上场係就係输咗，其实控球率接近七成，全场控制大局。查实以科拿路利同费兰度班顿呢对「南美双煞」嘅质素，要佢哋连续两场无货交都唔容易，何况今日对手纽卡素喷射机出晒名防守错漏百出，加上两连败后士气低落，今场作客都係凶多吉少喇！

至于听日先至踢嘅阿德莱德联对布里斯班狮吼，颓爆嘅阿联已经输到慌失失，可怜后防任人鱼肉。今场对住已经连赢叁场嘅狮吼，如果继续改变唔到防线穿窿嘅问题，单靠主场抢攻，随时畀对手「吼」窒，开入球大「餐士」唔低呢！