今个星期会有英超第11轮嘅赛事，车路士同阿仙奴都会喺主场出战，分别对爱华顿同热刺，呢两场波戏码就非常之吸引。睇番联赛榜形势，曼城、阿仙奴、利物浦同样都係10战得23分，但曼城以较佳得失球排喺联赛榜第一位，阿仙奴同利物浦就紧随其后分别排喺二、叁位，而排第四嘅热刺目前5胜5和得20分，暂时係今季英超联赛唯一不败之师，亦係和波最多嘅一队。

热刺曼联都唔易啃

阿仙奴近期嘅表现可以话势如破竹，球队已经喺联赛，杯赛加欧联各项赛事近15场保持不败，啱啱周中欧联作客保加利亚的卢多格德斯，凭奥斯尔完场前嘅入球绝杀对手3比2，喺A组同巴黎圣日耳门双双提早出线，暂时可以专注番本土赛事。球队目前成绩咁好，厂迷就当然对球队今季夺标前景充满信心。不过阿仙奴都经过几次教训，所以领队云格都唔敢太淡定，因为11月对阿仙奴算係第一个考验，先要喺主场对热刺，虽然对手近况就麻麻，但都唔易应付，跟手月中又要作客曼联，曼联为保争标希望，亦都係不容有失，所以呢两场波对兵工厂今季能否夺冠真係非常关键。