英超近年竞争极度激烈，犹如同一众球评家及博彩者开玩笑，上季就爆出一队石破天惊嘅冠军盟主李斯特城，豪门如曼联、车路士、利物浦亦无缘前4冇份打欧联，跌到周地眼镜碎。嚟到今季，本来今夏大事增兵嘅曼市双雄起步唔错，可惜好景不常，红魔开咧3连胜后又窒步，跌跌碰碰，至于各项比赛10连胜强势开局、将tiki taka玩到出神入化嘅曼城，忽然大跌Watt，近4仗竟然未赢过，包括周中欧联惨吞巴塞4蛋，连最富贵嗰两队都搞成咁，其余阿仙奴、车路士、利物浦等都喺唔同时段出现起伏，何解呢？
唔知读者会否了解，当一个人或一队波升呢，名利双收之后便会变得保守，打多啲稳阵波，以往拚死无大害嘅精神则被抛诸脑后，需知道身价高唔代表一定赢硬。李斯特城上季能够创造奇迹，除咗有时势之助外，主帅云尼亚里可谓功不可没，呢位意大利老帅教匀意甲、西甲、英超、法甲等各大联赛，饱历甜酸苦辣，甚至被嘲笑为冇冠军命嘅「千年老二」，而麾下嘅占美华迪等本属唔起眼嘅草根球员，喺呢种逆境嘅历练下，却造就出大无畏精神，马体会主帅施蒙尼亦如出一辙，打造出一支与皇马、巴塞抗衡嘅「床单兵团」。
唔单止足球，MLB（美职棒）亦有一支神奇球队克利夫兰印第安人，佢哋不但伤兵满营，人脚亦麻麻，于30队中班费排名第27位，竟然刚喺美国联盟决赛以总场数4比1杀败多伦多蓝鸟，跻身世界大赛（即MLB总决赛）。翻查纪录，克军只得几名新星，大部分係被遗忘嘅失意军人，反正冇乜嘢可以输，喺逆境下拚出无限战意。因此，英超依家吸金力强，尤其係豪门嘅球星及主帅，个个都炙手可热却变得锡身，只想行安全棋，唔敢兵行险着，面对一啲斗志十足嘅underdog（下风球队），便打唔出水准，导致战绩忽冷忽热。
