英超经过咗8周赛事，衞冕李斯特城暂时只得8分排喺联赛榜嘅第13位，连同上星期作客输0比3畀车路士场波，已经係佢哋今季第4场败仗，的确几令人失望。我之前亦提过李斯特城今季条路一定难行，因为以现有人脚係好难同时应付联赛同欧联两条战线，所以领队云尼亚里有时都会作出一啲取捨，好似上场对车路士咁，明显係为咗周二场欧联分组赛，收起马列斯同施利文尼两位中前场主力，最终导致球队大败而回，幸好周二球队以1比0赢咗哥本哈根，喺欧联分组赛取得3连胜，暂时有9分喺手晋级机会乐观。所以今周联赛主场对住水晶宫，喺唔需要留力嘅情况下，应该可以Full team应战！

对手水晶宫虽然上场喺主场以0比1输咗畀韦斯咸，但整场波嘅攻势都比对手多，而且有好多入波机会，可惜前锋宾迪基12码宴客，未能为球队扳平攞番1分，惟有希望佢今场波生生性性，入番球将功补过喇。