在任何体育赛事，作为一名职业球员或领队，就算对母会有极深厚情谊，只要係离队他投，若然再喺场上狭路相逢，各为其主下，于比赛期间就一定拚尽所能冇面畀。今晚欧联重头戏，巴塞隆拿主场迎战曼城，亦係曼城主帅哥迪奥拿重返娘家嘅倒戈之战，难免成为焦点。
哥迪奥拿係土生土长嘅加泰罗尼亚人，亦係巴塞青训产品，获已故荷兰球王告鲁夫赏识而晋升一队，并逐渐发展成世上其中一名优秀嘅组织型防中，直至2001年才离队。作为一名主帅，哥迪奥拿亦返回巴塞起步，先喺青年军执教，2008年正式代替列卡特接手一队，1年后即缔造6冠王霸业，并将美斯从超新星升级为球王地位，现时嘅「地上最强」战术体系，仍遗留好多哥帅带来嘅「痕迹」，佢对母会嘅贡献及感情绝非一般。
正正呢点，亦反映出哥帅对巴塞瞭如指掌，正所谓知己知彼，百战百胜，今仗佢率领曼城出战应该稍佔先机，虽然「蓝月亮」近期表现略为下滑，上仗逼和爱华顿1比1之役，奇云迪布尼及阿古路先后12码宴客，但有点不容否认，係曼城今季无论是控球、组织进攻及比赛信心均大有提升，乃前任比历连尼及文仙尼等难以相比，今仗受让一球，曼城下盘可秤先。
