利物浦下星期将会喺主场迎战曼联，呢轮赛事前，两队分别排喺联赛榜第4同第6位，论近况，「红军」肯定係比较好嘅一队，睇番佢哋最近喺联赛同英联杯7场赛事入面，就录得6胜1和嘅成绩，联赛更成功喺阿仙奴、车路士、李斯特城同热刺身上合共取得10分，证明利物浦对住同级对手特别有办法，高普早前同英国传媒暗示球队目标係联赛冠军，所以主场呢3分可以话志在必得！
不过，「红军」队中几名主力，喺过去两个礼拜都要为国家队出战世界杯外围赛，欠缺休息，或多或少会影响表现，今季由纽卡素加盟嘅荷兰中场韦拿杜姆，就喺啱啱对法国嘅比赛中受伤离场，好大机会喺今场大战缺阵，对高普嚟讲当然係坏消息喇。好彩球队仲有罗拔图法明奴及菲腊比古天奴等攻击好手在阵，连同早前为英格兰上阵、射入佢职业生涯第100球嘅史杜列治组成嘅进攻组合，相信都值得睇高一线。
相反，对手曼联上场主场只能以1比1赛和史笃城，表现持续飘忽，今仗仲要作客去到晏菲路球场，睇情况应该都唔太乐观！
