仲有唔够两周，今夏嘅转会窗便会关闭，依家消息满天飞，而一众名帅当中，最唔抵可怜就係又固执，兼且挂住为球队赚钱而坐稳帅位嘅阿仙奴领队云格。云格始终唔肯花大钱买球星，令阿仙奴未能重拾昔日嘅光辉，如英超或欧联等重要锦标欠奉，只捧微不足道嘅足总杯及社区盾，难怪近年经常有球迷拉横额，要求呢位功勋领队下台。阿仙奴近期陷中坚荒，有传睇中马体会守将荷西基文尼斯，甚至现效力西布朗嘅曼联弃将庄尼伊云斯都在考虑之列，但云格依然揿实个荷包，连呢啲2、3线球员都唔捨得使钱，今季成绩实难寄予厚望。
同阿仙奴孤寒相比，愿意一掷千金嘅曼城，近日刻意弃用门神赫特，并有传会将佢卖去西维尔，堂堂英格兰国家队首席门将，更係「蓝月亮」两夺英超冠军嘅功臣，竟然沦落到如斯田地，运动就是这幺残忍。球员不能单靠名气及往绩，最重要係现时嘅状态，尤其係门将，一定要长期交出平稳、可靠嘅演出，每当犯错便非常碍眼，但赫特多次于重要赛事「虾碌」，及犯上严重脑筋上嘅错误，有冇机会从谷底反弹呢？真係天晓得。人生就如郑少秋名曲《轮流转》，眼见同期于曼城出道、上季带领李斯特城封王嘅卡斯柏舒米高苦尽甘来，依家沦为弃卒嘅赫特绝不是味儿。
至于今晚英超，笔者睇好激情少帅高普麾下嘅利物浦可乘胜追击，继上仗作客4比3击败阿仙奴后，今仗造访般尼再赢一场。
金句：买卖球员时日无多，云格迟来可能上唔到岸
