万众期待嘅英超终于开锣，焦点落喺几大名帅大斗法。上季于车路士搞到英名尽丧兼季中被炒嘅名帅莫连奴，今季转教曼联痛定思痛，以天价罗致保罗普巴嘅举动，睇得出佢急于重振雄风，虽然普巴嘅转会费实在超高，但呢位23岁法国中场攻守兼备，正所谓千金易搵，良将难求，亦可消除其他球队买咗佢所产生嘅威胁，只要莫帅用得其所，普巴在中场嘅统治力足以左右大局，成为重夺英超宝座嘅关键棋子。

料「双红」有杯落袋

至于曼城亦邀得名帅哥迪奥拿执教，而车路士迎来意大利铁帅干地接手，今季又係阿仙奴领队云格入主球队20周年，斋睇佢哋同死敌莫连奴点样玩心理战同调兵遣将，已经好睇过戏。另一传统劲旅利物浦亦不能忽视，因为上季季中才接手嘅主帅高普，今夏可按照自己嘅谂法，于转会市场买人重建合其心意嘅班底，笔者通常会喺开咧后6至8周稍有眉目，先会预测边队会捧杯，不过相信今季「双红」曼联及利物浦，喺两大「脑」闆莫连奴及高普领导下，成绩一定好过上季，甚至有可能有杯落袋。

讲番今晚英超，有般尼茅夫主场对曼联、阿仙奴主场对利物浦及听晚车路士主场对韦斯咸，笔者较为睇好3支客军可打响头炮，信不信由你。