贵为欧国杯F组出线大热，有C朗压阵嘅葡萄牙经过两轮赛事之后，竟未打开胜利之门，今晚尾轮面对匈牙利已经冇煺路，想出线就要全力争胜，相信凭住破釜沉舟嘅决心，葡军可以度过难关杀入16强。
（now 651周四凌晨零时直播）
葡萄牙首场面对冰岛，有较多机会却把握力欠佳，领先1粒后又因一次后防大意被追和；上场对奥地利同样有多次入波机会，包括C朗嘅12码中柱不入，令这位刚刚超越名宿费高，以128次成为国家队上阵次数最多嘅射手，度过一个既自豪但又失落嘅晚上。
葡萄牙一向过度依赖C朗嘅入球能力，但经过漫长球季后，强如C朗都有力不从心嘅情况出现。过往两场未有入球嘅C朗合共起脚22次，撇除嗰个12码，当中只有5次禁区内起脚，其余都喺禁区外甚至更远嘅距离试射，但又因对手屯重兵于中路防守，有10次射门被敌衞封阻成功。
榜首匈牙利肯定会屯重兵于后防，葡军要攻破城池一定要有耐性，多尝试两侧进攻，而唔係强攻中路，期望能製造更多较近距离机会畀C朗埋门。个人相信葡军今战只要改善埋门效率，应可赢波晋级。
同组另一场由冰岛对奥地利（now 650周四凌晨零时直播），两军仍然有以头两名直接晋级机会，所以一定会全力争取3分。奥地利拥有像阿拉巴同阿拿奥杜域等个人能力较佳嘅人脚，如对攻的话或会稍为佔优。不过呢组嘅出线球队，之后都要打硬仗，首名出线会对E组次名，极可能会係比利时；次名出线则肯定对英格兰；第3名则会对C或D组首名，去到8强，唔知仲有冇F组嘅队伍继续参赛呢？
