兵工厂作客靠唔住
睇完欧联，今晚轮到欧霸4强次回合展开，首回合落后1比3嘅华伦西亚，返主场斗阿仙奴博翻盘。「蝙蝠军团」首回合拎到作客入球，随时係决定晋级关键；「兵工厂」作客曳，若然缩后嚟踢更难挡主队勐攻，简单要1.82倍主胜。
（myTV Gold 800、Now 644、有线662及602台周五凌晨3时直播)
华伦首回合虽以1比3不敌阿仙奴，都凭莫达迪亚卡拜拎到好重要嘅作客入球，今场目标十分鲜明，只要淨胜2比0就可跻身决赛。华伦今仗仲有防中高基连坐完波监复出，联同守将基比尔包列斯达齐齐倒戈，对注重中场控制嘅「蝙蝠军团」嚟讲绝对係好消息。
蝙蝠军团欧战主场特醒
华伦主场出战欧洲赛特别醒神，近5仗大获全胜，包括去年欧联分组赛赢过另一英超劲旅曼联；阵中葡萄牙翼锋干卡路古亚迪斯识入波又识助攻，配合脚风颇顺嘅土炮箭头洛迪高摩连奴，有力延续近期呢股「逆转」潮流。
阿仙奴首回合靠拿卡锡迪同奥巴美扬包办3球，先拔头筹，不过后防欠稳都係未解决。上场联赛主场畀白礼顿逼和失分，搞到「前4」冻过水，士气点都有影响。况且「兵工厂」今季作客唔争气，近8仗作客仅得2胜1和5负，单计欧霸就输过畀实力麻麻嘅巴迪同雷恩，今晚若然因领先两球刻意求守，将进攻主动权拱手让畀主队嘅话就更牙烟，一于捧主胜。