淘汰圈遇私房菜阿联
今日下午上演嘅澳职季后赛淘汰圈赛事，常规赛「4哥」阿德莱德联主场迎战墨尔本城。阿联近况睇落虽然唔错，但锋力麻麻，而且近年交手畀墨城食住，就算有地利亦靠唔住，墨城有得受让咁笋，梗係捧让球客胜。
（myTV Gold 302、Now 639、有线655及615台周日下午5时直播）
阿联近5场联赛4胜1和，包括常规赛尾轮以5比3击败布里斯班狮吼，但众所周知狮吼係「黄大仙」，后防有求必应，而且睇番阿联今季27场常规赛，只係入得37粒，仲少过尾2嘅狮吼，只係比包尾大幡中岸水手多，锋力唔算锐利。
近7次交手未输过
墨城最后一轮常规赛主场大胜中岸水手5粒，趁住威灵顿凤凰淨吞珀斯光辉5蛋，得以凭较佳得失球差赶过凤凰进佔第5位，成功喺首圈淘汰赛避开同市宿敌墨尔本胜利，明显行运。
连埋今季在内，墨城已经连续5次出战季后赛淘汰圈，其中对上4次有3次能够赢波晋级，应付淘汰圈可谓驾轻就熟。相反阿联上季以常规赛第5名身份打入季后赛，却喺淘汰圈首战输畀墨尔本胜利早早出局，今次要喺法定时间内赢墨城估计唔易。加上双方近7次正面交锋，墨城取得4胜3和未输过，明显格食格，仲有得受让必捧让球客胜。