留力撼巴塞冇兴趣炒哈
今晚英超独脚戏，利物浦主场迎战笃定降班嘅哈特斯菲尔德。红军豪取9连胜坚劲，不过嚟紧周中有欧联硬撼巴塞隆拿嘅顾虑，今场面对弱到爆嘅哈特斯，随时见好即收，领先紧就收缰，3.5球嘅入球细更加值博。
(Now 621周六凌晨3时直播)
利物浦临近季尾即翻生，联赛连盃赛在内豪取9连胜，现时落后曼城1分，依然保持争夺联赛冠军机会，仲杀入欧联4强，表现及成绩更胜争标劲敌曼城。不过红军嚟紧下周中欧联4强首回合，要先作客「地上最强」巴塞隆拿，对方有弗到震嘅球王美斯助阵，而且鲁营主场威力唔讲得笑。相比之下，今场只是主场迎战对弱旅哈特斯菲尔德，为免消耗太多体力及增添伤兵，影响到巴塞场波，随时入波后即收缰，甚至换走部分主力，只求赢波3分不求大炒哈军。
近3对赛哈特斯食白果
包尾大幡哈特斯菲尔德曳到冇朋友，近13场联赛输咗12场，难怪提早宣布降班。哈特斯最大问题係攻力极度疲弱，今季联赛合共仅入20球，唔单止係火力最弱嘅英超球队，仲比入球第2少嘅卡迪夫城少10粒，阵中首席射手卡兰格兰入得4球咁大把，真係冇还手之力。哈特斯明知实力差几条街，自上季升上英超后遇强必玩死守，近3次斗利物浦全部食白果，兼全开3球或以下，何况已笃定降班，唔慌有战意，造访或略作保留嘅红军，捧3.5球嘅细盘更稳阵。