欧联分组赛E组最后一轮，阿积士主场同拜仁慕尼黑争小组首名。双方赛前已笃定打入16强淘汰赛，拜仁今仗和波都够首名出线，但历来作客阿积士往绩输蚀，今场让唔起全面升呢嘅主队，阿积士今届分组赛主场两战全胜，受让平半黑柴力撑下盘！（有线662及602台周四凌晨4时直播）
欧洲「少林寺」再爆新星
阿积士以往一向系球坛青训翘楚，堪称欧洲「少林寺」，球队经历过一段漫长嘅艰难时期后，终于捱到中兴迹象，前季以极年轻班底攞到欧霸盃亚军，今届更系近13年来首次杀入欧联淘汰赛。阵中除超新星法兰基迪庄同马菲斯迪历特成为全欧洲豪门挖角焦点外，岩岩伤愈嘅摩洛哥进攻中场薛耶治同巴西年轻前锋大卫拿尼斯都系转会市场抢手货，现时阵中人脚实力远比两年前欧霸亚军队成熟，前线又有德甲熟人亨特拉尔领军，年届35嘅佢仲系球队首席射手，今晚对住昔日史浩克04队友纽亚，会特别肉紧争入波。
拜仁滑落冇乜优势
阿积士今晚仲有一项优势，就系佢的打德甲兵特别有心得，过去主场16次对德甲兵赢左14场，历来4次主场对拜仁亦获3胜1和，阿积士分组赛首循环作客安联球场，补时阶段舒奥尼几乎绝杀拜仁，可惜射门畀纽亚救到再中楣弹出，最终和波，足见佢的有抗衡拜仁嘅实力。何况主帅坦哈格喺2013至15年曾执教拜仁二队，对呢支德国班霸知根知底。
拜仁今季战斗力明显系近年最弱，目前喺德甲已落后多蒙特9分，新帅尼高高华仲未能够喺更衣室树立权威，现时人脚相比起阿积士亦冇明显优势。拜仁今仗只要和波就可首名出线，冇必胜欲望，作客让波捧对家。