和都留级唔同你急
日职/日乙附加赛决战今午爆发，日职尾三嘅磐田山叶，主场迎战日乙升班附加赛胜方东京绿茵，由于双方同样守优于攻，佔尽地利人和嘅磐田，打和都可以留级，呢场波开出半场和嘅机会甚高。
（有线662及602周六下午1时直播）
近3年两队天各一方，连盃赛都未碰过头，但系睇番2015年以前交手，磐田喺山叶主场食到绿茵一戙都冇，6次对战取得4胜1和1败，显然磐田喺自己地头打绿茵比较有把握。何况今场波啲飞两日前就畀磐田趸抢购一空，绿茵球员将会面对主场球迷声势浩大嘅嘘声，更加容易震腾腾。
根据赛制，打和由日职球队胜出，而和波都可以留喺日职嘅磐田，有中村俊辅、大久保嘉人呢啲过气国脚在阵，理论上逐个秤都赢到绿茵，问题系佢的唔只节奏慢，啲巴西外援又表现麻麻，艾达顿杜斯山度士、加比尔摩碧克真系坐多过踢，基本上旨意晒川又坚碁一个数胡，好易畀人冻结，今季射门成功率得7.7个巴仙，就说明磐田点解34场联赛只入35球，成为日职攻击力次弱嗰队。
东京绿茵守优于攻
非胜不可嘅绿茵就靠防守搵食，联赛42战失41球，系日乙防守次佳，不过56个入波又系日乙前8名次差，虽则话中场内田达也今场停赛刑满复出，可以填补伤兵泉泽仁个位，绿茵算得上系夫添，但系佢的踢日乙都只得场均11.6次射门，属于联赛下游水准，对住日职球队，想发动狂攻亦有心无力。
基于大家都缺乏强攻致胜本钱，呢个礼拜日日闭门操练嘅磐田，多数採取守株待兔方式，等急于求胜嘅绿茵嚟攻至打反击，半场好易陷入胶着，1.88倍半场和比较抵玩。假如真系中左，下半场走地可以谂磐田1.74倍第一队入球，事关到时急嘅实系绿茵，谷得太前，可能暴露更多空位畀磐田偷到鸡。