33岁卡佩图做蓝衫军新丁
2020/09/04

卡佩图（左）练波时心情甚佳。

文仙尼执教意大利国家队后，唔只创出佳绩，而且不断提拔新兵，为球队注入新血，文帅今次出战欧国联嘅大军名单又有新搞作，拣选咗3位「新丁」，包括国米中坚巴斯东尼，2位萨斯索罗球员卡佩图、文路尔卢卡迪利。

当中最引人注目梗係卡佩图，事关呢位前锋自2005年出道至今，绝大部分时间喺低组别联赛搵食，甚至踢过业馀球队，直至加盟当时踢紧意乙嘅巴里，事业先至有起色，协助球队于2008/09年球季获得意乙冠军，升上意甲。

技术全面或成秘密武器
上年夏天加盟萨斯索罗，卡佩图更创出事业高峰，去季意甲上阵36次入21球，排射手榜第4位，其中萨军两循环逼和1哥祖云达斯，佢都有入波，可以话係蔗渣价钱踢出烧鹅味道，令佢以33岁「高龄」首度获徵召入「蓝衫军」，真係估佢唔到。

卡佩图技术全面，可以胜任前锋同翼锋，甚至可以客串进攻中场，意大利有呢位全能老将，令球队进攻招数更加多元化，绝对唔好因为年龄，而忽略佢嘅重要性，甚至可以视为意军嘅秘密武器。