摩佬学韩文同孙兴民沟通
2020/08/28

摩连奴（左）对孙兴民甚为重视。

热刺教练摩连奴正忙于进行季前准备，除咗带队踢热身赛备战，喺转会市场执货之外，原来仲去咗学韩文，希望可以增进同南韩前锋孙兴民嘅沟通。

葡萄牙籍教练摩连奴精通6种语言，包括母语葡萄牙文、西班牙文、英文、法文、意大利文以及加泰罗尼亚语，「摩佬」对学习语言十分重视：「语言係对当地文化嘅尊重，加上可以令我进一步了解球队入面嘅唔同文化。」另外佢认为语言能够令球员清楚接收自己嘅指令：「当我同球员交流个阵，沟通好紧要，我必须用所有人都理解嘅母语，所以我依家学紧韩文。」

今晚友赛雷丁有得睇
热刺球星孙兴民係上季热刺嘅次席射手，仅次于哈利卡尼。呢名28岁南韩国脚喺各项赛事射入18球，交出12次助攻，摩连奴因为佢专程去学韩文都无可厚非。

孙兴民现时已经操起晒，上周六首场热身赛斗叶士域治已经射入2粒，助热刺3比0赢波，今晚佢哋搵嚟英冠球队雷丁拍跳，踢佢哋4场季前热身嘅第2场，相信都会多波入，大家等睇入球骚啦。（Now 621周五晚10时直播）