劲旅对碰鲸鱼前锋大斗法
2020/08/23文:笛子波童
日职前列大战，名古屋鲸鱼周日主场火併1哥川崎前锋。前锋周中喺榜首战大炒大坂樱花后，今季联赛累积至10胜1和不败，并以10分抛离樱花遥遥领先，佢哋11场攻入34球火力冠绝日职，作客攻击力一样强横，今场作客鲸鱼3.5球嘅入球大值博。

（有线661及601台周日下午5时直播）

鲸鱼攻击孖宝担正
川崎开季走势凌厉，除咗联赛首仗被鸟栖砂岩闷和0比0，日职重开后势如破竹豪取10连胜，10仗攻入34球仅失9球，周中主场以5比2大胜排次席嘅樱花，3位得分主力李安度达美奥、小林悠及三笘薰均有进帐，其中小将三笘薰如果再建功，就会追平名宿城彰二、柳泽敦嘅连续4场入波新人纪录，肯定搏尽。其实喺复赛连胜旅途上面，川崎唯一未赢过嘅就係鲸鱼，呢个月12号日联盃作客，佢哋受制于名古屋嘅酷热天气，只能同对手打和2比2，今番联赛再遇当然希望赢波。

鲸鱼周中凭马迪奥斯杜斯山度士补时入波，作客1比0击败湘南比马后，由第5升上第3位，今仗返主场迎战前锋，定必乘勇抢分，唔会坐以待毙。尤其球迷要注意一样嘢，鲸鱼喺日联盃打和川崎场波，其实係阵容不整嘅，当时前锋金崎梦生因为喺分组赛时未转会，帮鸟栖砂岩上过阵，依例唔准披甲，攻守核心阿部浩之又养紧伤，唔可以夫添出击，据讲呢两名大将今场多数担正，更有本钱同川崎驳火。

论往绩，双方34次对战川崎前锋取得19胜8和7负嘅明显优势，但係客胜得1.62倍回报唔多吸引。再睇番川崎今季7场作客赛事，当中6次开4球或以上，有咁靓数据支持，今场大家精锐尽出，夹手夹脚入够4球唔难，推介有2.45倍嘅入球大合理。