欧霸决战西维尔受让笋


牌面输蚀经验搭够
今晚于德国科隆上演欧霸盃王者之战，由5届盟主西维尔硬撼3届冠军国际米兰。论牌面西维尔星味唔及对手，但近14年来5度闯欧霸盃决赛，唔单止法定时间未输过，全部都捧盃而回，「欧霸之王」绝非浪得虚名，经验赢晒10年来首入欧战决赛嘅「蓝黑兵团」，仲有得受让咁笋，让球主胜有买趁早。

(myTV Gold 303、Now 643、有线656及616台周六凌晨3时直播)

论实力，西维尔只属欧洲一线尾球队，好似卢克迪庄、班尼加、苏索、费兰度法兰斯高等均属豪门弃将，不过喺欧霸盃零舍sharp醒，例如4强面对强敌曼联，喺先失球劣势下反胜2比1，韧力无与伦比。

何况，西维尔与欧霸盃特别有缘，自2005/06年度球季起，5度杀入欧霸（或前身欧洲足协盃）决赛，喺法定时间取得3胜2和未输过，包括2016年以3比1反胜高普领军嘅利物浦，而2次打和最终均凭互射12码赢埋，即係话佢哋每逢入决赛，夺冠率高达100%，唔讲得笑。

国米不擅对付西甲兵
另一边厢，国米亦气势如虹，转战欧霸盃后5战全胜，包括4强大胜萨克达5比0，佢哋曾经3夺欧洲足协盃（欧霸盃前身），仅次于西维尔。但与西维尔近14年来5入欧霸盃决赛相比，「蓝黑兵团」近23年只曾2次打入欧洲赛决赛，上次已经係2009/10年度嘅欧联决赛，经验输蚀。同时「蓝黑兵团」坚怕西甲兵，近6次喺欧洲赛面对西甲球队，只得1胜1和4负，遇上「欧霸之王」西维尔仲要让波制唔过，让球主胜乃不二之选，不妨捧埋有2.2倍嘅西维尔「冠军」。