风流波FC悉尼志在试阵 阿德莱德联受让抵玩
2020/08/06文:渡边年

FC悉尼箭头 方祖

1/2
澳职周四独脚戏，阿德莱德联喺新南威尔斯澳大利亚体育场对FC悉尼。排第6嘅阿德莱德联力争季后赛资格，复赛后3战保持不败，相反FC悉尼提早赢得常规赛冠军，大踢风流波下已录得2连败，累积联赛近5战只得1胜，今场阿德莱德联受让，让球主胜抵玩。（myTV Gold 302、Now 639、有线655及615台周四下午5时30分直播）

澳职喺7月中复赛后已经踢咗3轮，由于疫情关係，阿德莱德联虽然冇咗主场，但球队表现上乘，3战联赛排名前6球队，合共取得7分，佢哋先以1比0力克狮吼，跟住同凤凰踢成1比1，上仗同珀斯光辉更合演疯狂入球骚，最终以5比3赢波。

阿联复赛愈踢愈顺
虽然「阿联」进攻铁三角杜罗奥斯、米利奥斯历同哈辛托尼继续因伤倦勤，但挪威前锋基斯甸奥薛夫孭起入波重任，复赛后3场都有波入，脚风顺到冇朋友，而且19岁澳洲小将拉治兰布鲁克近2仗都获提升喺一队正选上阵，为阿德莱德联增添唔少活力，上仗更射入澳职处子入波，相信今仗会续获正选机会，肯定会同你搏命。

FC悉尼已经提早封王，亦因此喺复赛赛事出现不少令人意外嘅排阵，明显就係唔理战果，希望不停试阵为季后赛冠军之路铺排最佳阵式。FC悉尼复赛3场录得1胜2负，累积近5场联赛只赢过1场，斗心一般今场唔值得睇好，要让波就梗係反佢哋，捧番「阿联」让球主胜。