莱切救亡大作战
2020/08/02文: 法达斯维

莱切前锋 拿柏度拿

1/3
降班边缘同热拿亚分途搏命
今晚意甲煞科，既然祖云达斯已经封王，焦点就落喺护级生死战，排尾3、4嘅莱切及热拿亚为咗有得留低，两队只能活一队。佢哋分途出击，其中莱切主场硬撼帕尔马，由于莱切形势非常被动，非胜不可下要豁出去抢攻，中场文高素近期脚风奇顺，撞正将有富豪入主要争取表现嘅帕尔马，随时斗攻，3.5球嘅入球大不容错过。

(myTV Gold 302、Now 639、有线655及615台周一凌晨2时45分直播)

先讲讲护级形势，依家最尾嗰两队史帕尔同布雷西亚已笃定降班，排尾3嘅莱切就落后尾4热拿亚1分，而且对赛输蚀，千祈唔好谂住自己打和而热拿亚输波呢啲缩数，因为就算咁样追到同分，亦会因为对赛成绩较差而屈居人下，所以今仗对莱切嚟讲係非胜不可，仲要望热拿亚失分先有价讲，极度被动。

撼帕尔马落场即抢攻
莱切目前能够掌握嘅只有自己嘅成绩，必定尽地一煲抢W，佢哋近3仗获2胜1负，包括上轮反胜乌甸尼斯，令士气大振。莱切为护级近期亦採用冒险踢法，落场即主动抢攻，中场文高素近11仗有6球进帐，脚风奇顺，若果单计主场，莱切近6仗有4次开4球或以上，全部有入波及失波，真係入得又失得。

另一边厢，原本踢紧风流波嘅帕尔马，因有传卡塔尔富豪快将入主，近期大踢争气波，希望喺新老闆进驻前留个好印象。帕尔马之前连赢拿玻里同布雷西亚，上仗对阿特兰大反输1比2，虽败不辱，今仗唔会因莱切要护级而hea踢，3.5球嘅大盘有买趁早。

热拿亚打「罗」主W稳阵
至于同时间开波嘅热拿亚主场对维罗纳，热拿亚今仗目标鲜明，只要赢波即护级成功，毋须理会其他赛果，佢哋近3场主场赢2场，只係输过畀劲旅国际米兰，维罗纳冇晒目标应该唔会阻人发达，主胜有计。

（myTV Gold 301、Now 638、有线654及614台周一凌晨2时45分直播）