罗拔仔获Goal老师过料
今晚有场具睇头嘅热身赛，德甲盟主拜仁慕尼黑于自家青年队球场，迎战法甲劲旅马赛。虽然德甲已收咧，但拜仁仍有欧联任务，因此要靠「拍跳」 Keep住状态，弗到爆嘅射手罗拔利云度夫斯基更加得到「Goal老师」高路斯指点，随时更Sharp醒，加上马赛近期热身赛入得又失得，随时合演入球骚。

（myTV SUPER周五晚10时直播）

拜仁啱啱完成德甲8连冠霸业，但佢哋仲有欧联征程，16强首回合大胜车路士3比0，嚟紧8月头要踢次回合，预计晋级机会极大，意味拜仁去到8月仲会好忙碌，因此经过短暂休息后，话咁快就复操，迎接欧联同嚟紧联赛开咧。

主帅汉斯弗利克强调对「车仔」唔可以大意，希望尽快操起状态，而新季佢又多咗位助手帮手，就係从二队提升上嚟嘅高路斯；呢位世盃决赛周史上入波最多嘅前德国国脚，主力负责指导前锋，据报完成操练后，佢特登同射手罗拔利云度夫斯基加操，进行射门训练同畀建议佢，相信上季德甲金靴得主「罗拔仔」获益良多。

利莱辛尼有望登场
拜仁喺今夏成功签入曼城翼锋利莱辛尼，虽然佢冇份踢欧联，但预计今仗会披甲，再加上基拿比、哥列斯卡支援「罗拔仔」，势必火力全开。不过弗利克亦收到个坏消息，主力后衞班捷文柏华特因伤要抖4至6周，今仗热身赛同欧联对车路士肯定唔使预佢，或影响防线稳定性。

另一边厢，由于上季法甲因疫情而中途腰斩，令当时排第2嘅马赛取得亚军及下届欧联入场券。而且马赛早前仲收到喜讯，就係王牌皮耶落实减薪续约至2024年，坚係有情有义。睇番马赛近3场热身赛狂轰12粒，但场场都有失波，入得又失得，造访对上7仗有6次开3球或以上嘅拜仁，肯定多波入啦。