史云斯冲超佔先机
2020/07/28

1/2
阿休中柱宴客再入波
史云斯射手安祖阿休经历中柱、射失12码及一箭定江山，喺英冠升班附加赛首回合，带领「天鹅」以1比0击败宾福特（黑衫），宾福特有后衞域高亨利红牌被赶出场，喺周四凌晨嘅次回合赛事要停赛，史云斯近6场联赛作客3胜3和，宾福特要反先似乎有啲难度。

虽然史云斯喺联赛最后一刻先至攞到附加赛资格，但今场踢来不落下风，控球率达57.8%，14次射门中7次，相反宾福特12射只得3中。今场射手安祖阿休做主角，呢名加纳射手上半场末段，接应进攻左路角球头槌攻门，对方门将已经冇晒反应，点知个波就中柱唔入。

宾福特后衞域高亨利领红
到咗下半场18分钟，史云斯获得12码，安祖阿休主射被扑出，以为佢黑气缠身，但3分钟后宾福特后衞域高亨利侵犯史云斯球员直红出场，「天鹅」喺人多虾人少之下压住嚟攻，终于喺82分钟有收获。安祖阿休喺右路发动攻势，同队友干拿加历查及积富顿极靓合作嘅三角空中短传，安祖阿休半窝利抽入，助球队首回合以1比0领先。

自1947年从未于顶级联赛亮相嘅宾福特，次回合虽然有主场之利，但史云斯近6场联赛作客表现稳定，获3胜3和不败成绩，只要能够保持不败，就能够晋级附加赛决赛。