北伦敦打吡撑阿仙奴

2020/07/12文:法达斯维

热刺快翼孙兴民

1/3
热刺飘忽靠唔住
今晚英超爆发至激北伦敦打吡，由热刺主场硬撼阿仙奴。双方争逐前4嗰张欧联入场券仍未绝望，不过热刺主帅摩连奴近期战术摇摆不定，搞到战绩时好时坏，加上多名主力伤停都几择使，相反阿仙奴愈战愈勇，打吡战实打甩髀，平手盘值得捧场。（Now 621及611周日晚11时30分直播）

热刺主帅摩连奴死性不改，除咗季中接手时玩咗一轮疯狂抢攻战术后，近期又萌生保守念头，但係採用3412、4231及433边套阵式未揸定主意，场场都试阵咁，令众将无所适从，加上艾历迪亚被罚停赛，焗用状态急跌嘅维顿汉镇守中路，更令防线存隐忧。热刺前线虽有哈利卡尼伤愈复出，但佢喺新阵式下减少堕后策应，多于禁区等机会，可惜无论係卢施素、孙兴民、拉美拿等都冇乜供应畀到佢，上仗闷和般尼茅夫0比0之役，热刺录得射门零中龙嘅纪录，难怪自复赛后只得2胜2和1负喇，另一中场迪利阿里又可能续抖，攻力进一步削弱。

与摩帅嘅举棋未定唔同，阿仙奴经过复赛头2场输波后，主帅阿迪达为巩固防线果断变阵343阵式，让哥拉辛拿斯客串中坚，伙拍大衞雷斯及梅斯达菲，再配合中前场球员回后助守，的确令防线稳阵咗好多。

「厂仔」客场脚软病好番晒
阿仙奴喺上周赛和李斯特城后，联赛连盃赛近5场取得4胜1和，战绩及信心全面回升。同时，向来客场脚软嘅「兵工厂」，近期明显有改善，连盃赛作客豪取3连胜，包括击败硬淨嘅狼队，重燃争前4嘅希望，除咗奥巴美扬近3仗联赛入3粒，刚续约嘅小将布卡约沙卡，近2仗亦交出1入波及1助攻，之前因老婆临盆而缺阵嘅尼高拉斯比比，今仗有机会复出，加上近3次联赛交手未输过，阿仙奴平手盘坐走望赢。