锡菲联铁桶阵细顶维拉

2020/06/17文:渡边年

锡菲联后衞积奥干尼

1/2
正式为英超重开揭开序幕嘅，係阿士东维拉主场斗锡菲联。锡菲联今季凭藉坚固防守进佔联赛榜第7位，现时失球数字属英超第2少，佢哋喺停摆前11场联赛作客，有10次开2球或以下，预料今场会以稳守行先再伺机突击，况且维拉亦欠进攻板斧，中位数2.5球入球细好路。（Now 621周四凌晨1时直播）

经过3个月停赛期，阿士东维拉于上周四同李斯特城同日踢咗两场热身赛，希望操起状态，下画踢1场，夜晚踢1场，维拉喺主场输0比1，但作客李斯特城就赢3比0。至于锡菲联则与正副队长比利沙柏及罗活续约，提升士气。

两队都係今季嘅升班球队，但经过大半季之后成绩却大有差别；今次主场出击嘅阿士东维拉，现时28战25分排尾2，同联赛排名对上3队有2分距离，馀下赛事要为护级努力。相反，锡菲联则28战43分排第7，同第4位嘅车路士相距5分，下届欧联入场券仲有得争，确实唔简单。

维拉欠入波本钱
锡菲联今季全靠防守打天下，联赛28战只失25球，仅比利物浦多失4球，今季10场不失球赛事中，包括首循环以2比0击败维拉。锡菲联作客以铁桶阵抗敌，停摆前11场联赛作客10次开2球或以下，今场应该会用番呢套技术招呼维拉，再搵机会突击争取入波。至于主队阿士东维拉冇乜入波本钱，攻势太集中喺球星基亚利殊身上，因此锡菲联只要作出针对性部署就搞掂，加上今场係闭门作赛，维拉冇咗球迷打气，表现随时再差啲，预计今场入波唔会多。