柏林联斗拜仁开大餐

2020/05/17

拜仁反击王基拿比

1/2
主场遇强照抢
今晚德甲榜首拜仁慕尼黑登场，作客斗柏林联。拜仁自换帅后重返正轨，不过作客经常有失波，遇上踢法进取嘅柏林联未必可保持不失；柏林联今季主场斗前列球队经常上演入球骚，捧中位数3.5球大盘最明智。

（Now 671、有线612及652台周一凌晨零时直播）

拜仁自从去年11月由汉斯弗利克接替尼高高华掌帅后，重拾班霸本色，除停摆前11场联赛攞到10胜1和，欧联16强首回合作客更以3比0大破车路士，加上德国盃杀入4强，目标直指3冠王。为稳定军心，拜仁喺停摆期间先后同汉斯弗利克、汤马士梅拿及新星艾方素戴维斯续约，同时提升U17教头高路斯下季担任助教，所以今次疫情对拜仁影响唔大。

罗拔仔伤愈候命
停摆前喺欧联受伤嘅罗拔利云度夫斯基经已伤愈，呢名拜仁神锋今季联赛轰入25球，比自己上季攞德甲神射手嘅22球仲多。不过拜仁季初之所以一度跌出联赛榜三甲，同防线不稳有极大关係。今季佢哋12场作客联赛失15球，场均失波多于1球，相信会以攻代守。

未计寻晚赛事，柏林联暂排联赛榜第11位，唔算失礼，首席前锋施巴斯坦安达臣射术有番咁上下，而且柏林联主场够进取，今季12场联赛主战得2场食白果，其馀10战加埋入咗18球，当中试过赢多蒙特及慕逊加柏，仅以2比3不敌利华古逊，面对强队冇包袱一样照攻。首循环碰头拜仁主场亦只係险胜2比1，今晚作客让二球略嫌过火，客Ｗ亦冇乜肉食，不如转捧中位数3.5球嘅大盘。