神经刀贺芬咸主场大盘王

周六德甲有场贺芬咸主场斗哈化柏林，贺芬咸可以讲係德甲神经刀，主场赢过多蒙特、利华古逊等前列强豪，同时又可输畀奥格斯堡、缅恩斯等护级球队；哈化柏林停摆期间有护级专家拉巴迪亚上任，为打德甲保衞战，首战作客照抢。贺芬咸今季13场主场联赛有11次开3球或以上，係德甲主场开大最多球队，今场捧大最好路。

哈化搵护级专家打保衞战
哈化柏林今季头12轮联赛只得11分，为拯救球队上年底搵咗「奇哥」奇连士文出山执教，点知佢只係教咗10场波，就以不获高层信任为由「噼炮」，搞到队波失晒预算。哈化喺停摆前联赛榜排第13位，排名仲低过新升班嘅同市球会柏林联，面子尽失，而且只比尾3嘅杜塞尔多夫多6分，随时捲入降班漩涡，为重振声威，球会邀得拉巴迪亚接手；呢位护级专家之前曾经「拯救」汉堡及禾夫斯堡等球队，今次嚟到哈化有望照办煮碗。

贺芬咸停摆前各项赛事6场不胜，表现似走下坡，不过佢哋今季主场曾经赢过「2哥」多蒙特及利华古逊，脚风顺起上嚟唔係人咁品，加上目前只比第6位嘅史浩克04少2分，有权问鼎来届欧霸盃参赛资格，压力相对冇咁大下，相信会继续踢进攻足球。