球迷福音！周五仲有波踢
新冠肺炎席捲全球，令唔少联赛都处休战状态，不过阿根廷冇有怕，第2年举办嘅阿根廷超级联赛盃如期上演，昨晨B组分组赛爆出冷门战果，喺刚结束阿甲排尾2嘅高隆，作客以3比1击败赛前主场6连胜嘅罗沙里奥中央，嚟紧周五早上A组有场沙士菲对圣达菲联，两军踢完阿甲之后都出现换帅情况，联赛排名较高嘅沙士菲会唔会步罗沙里奥中央后尘呢？

罗沙里奥中央赛前主场6连胜，而且今场正选阵容亦有前锋马高鲁宾、李奥斯、中场法比安连拿奥度及迪亚高萨巴拿等常规正选，势估唔到对住高隆上半场竟然捱打，高隆凭拉菲尔迪加度、威尔逊摩尼路及查安卡尼各建一功，半场遥遥领先3比0，爆出200倍「半场波胆」！换边后罗沙里奥中央只能由马高鲁宾破蛋，输得冇咁难睇。同组另一场比赛亦係由客军胜出，上届4强分子小阿根廷人以1比0击败拉鲁斯，睇嚟阿超联盃特别旺客军。

圣达菲联易帅冇走样
周五早上A组将上演沙士菲对圣达菲联，沙士菲喺阿甲球季结束后有主帅轩斯离队，虽然球队落实会由前华伦西亚及修咸顿教头比历坚奴接手，不过比帅暂时仲未正式履新，今场好大机会继续由看守教练摩历治领军，沙士菲首场分组赛作客0比1输畀独立队，似乎仍须时间适应新转变。至于对手圣达菲联阿甲煞科后亦换帅，执教3季嘅主帅麦迪隆已辞职，不过球队喺看守教练马些路摩锡带领下，首场分组赛以1比1打和沙兰迪兵工厂，整体演出冇乜点走样，作客沙士菲未必冇得打。